大陸富婆Laura同TB製片汪子琦嘅恩怨情仇,以為隨着今年5月在美國簽紙離婚而終結,點知分手僅半年,兩人竟然約埋在感恩節到美國康州睇李克勤演唱會,懷疑兩人玩翻撻。

知情人士表示:「頭先喺金神大賭場睇演唱會,喺大門口見到佢哋攞飛入場,打扮得好靚,冇同行朋友,自己睇到覺得好愕然,之前佢哋唔係話離婚咩,講到大家好不和,但佢哋完全唔似仇人,好似好有默契嘅情侶。」

不過,知情人士提供嘅相片,只影到Laura嘅背面,睇唔到樣!知情人士表示:「Laura着灰色裙仔、彩色鞋,打扮得好行,汪子琦就好似Tom boy,佢哋好引人注目,好似完全唔驚人哋睇到。排隊入場要過安檢,汪子琦對佢照顧周到,自己過完安檢後,等埋Laura先入場。」

當日兩人嘅同性婚姻失敗,爆出汪子琦苛索3,000萬美元(約2.4億港元)贍養費,離婚官司糾纏半年,最後汪子琦人財兩失,Laura更寸爆前度:「貪字得個貧!」

估唔到事隔僅半年,兩人已經約埋睇騷,問到係咪復合?Laura以短訊回覆傳媒堅決拒絕:「No!無可能!我有10張vip tickets,還有其他朋友和家人,因為我鍾意李克勤啲歌,汪子琦主動聯繫我,佢話已經安排好,帶我去後台影相。我同汪子琦騷前有一起食宵夜,傾咗半個鐘,所以一起入場。」

點解離咗婚仲撐枱腳?Laura表示:「唔叫撐枱腳,只是有些事其他人在唔好傾。而且有些朋友在賭。」問到離婚搞到咁唔開心,點解可以做番朋友:Laura話:「無過分要求,唔會係我仇人囉。」佢仲強調現在無拍拖,但大把人追。

汪子琦同樣話冇復合:「沒有復合。她不怎麽理我的。離婚的時候我就說過。她永遠是我最重要的人,我肯定不想和她做仇人;這次是我聽其他朋友說她也要看李克勤演唱會,所以我主動聯繫她,可以帶她去後台。」

(資料來源:網上截圖/連結)