麥明詩同馮盈盈今日又孖公仔出席《萬千星輝頒獎禮2018》提名名單公布記者會,麥明詩連女配角都未提名過,就越級挑戰「最佳女主角」,仲獲提名「飛躍進步女藝員」,「電視節目主持」和「最受歡迎電視拍檔」。

麥明詩被稱「準視后」,佢笑言要「搵窿捐」﹕「呢個提名好驚,我都係硬着頭皮企上台,好多勁人入圍,覺得自己唔應該入圍。」佢直言怕畀人鬧,其實越級挑戰仲有《跳躍生命線》嘅劉佩玥同《大帥哥》嘅蔡思貝,所以馮盈盈都有安慰麥明詩,話同陸浩明都會全力支持佢。

盈盈都好犀利,一口氣獲提名5個獎項,包括「最佳女配角」﹑「飛躍進步女藝員」﹑「最受歡迎電視女角色」﹑「電視節目主持」和「最受歡迎電視拍檔」,成為最多提名女藝人。佢話﹕「好幸運,今年入綜藝組,又拍《果欄中的江湖大嫂》,參與好多唔同界別!」台慶當晚唔着底褲成為焦點,問到頒獎禮着乜?佢話﹕「會調轉,上次成熟性感,今次會走清純後生女路線。」

(資料來源:網上截圖/連結)