木偶哥林師傑,今日同拍拖4年嘅歐陽巧瑩(Tammy)結婚,佢哋喺尖沙嘴筵開35圍,一對新人兄弟姊妹團加埋有9男7女,姊妹團有蔚雨芯、麥美恩、朱晨麗及劉佩玥等,至於兄弟方面,則有譚俊彥、周志康、羅天宇等,而圈中好友何雁詩、洪永城及許家傑等,亦有到場。

一對新人應大家要求咀足一分鐘,咀完後,林師傑就好深情咁望住老婆講「I Love You」林師傑同Tammy透露,今日冇接新娘環節:「今日最重要嘅環節叫『瞓晏啲』,因為想大家開心同埋可以分享呢個喜悅,屋企人亦好理解我哋,唔使要我哋做啲好傳統嘅嘢,所以就瞓晏啲迎接新娘,今朝6點瞓到12點,主要都係整座位表。」

至於Tammy就話同林師傑拍拖4年,都未見過佢咁緊張:「今日佢攬住我嘅時候,佢個身都發熱、成身震晒,feel到佢都真係緊張同想喊,點知到訪問嗰陣就嚟料。」而Tammy仲話:「哎呀,我第一次見你咁咋,好得意呀,你又成日好尷尬同手足無措咁,好搞笑呀!」,而林師傑就指一直聽人講搞婚禮好大壓力,但自己就一直keep住輕鬆態度去面對:「但今日見到一班兄弟姊妹去為我哋去奔波、做嘢嘅畫面,都俾佢哋感動咗。」林師傑又透露今晚已準備咗一首叫《美麗的你》嘅歌道畀太太:「不過首歌只係完成咗半首,所以今晚會同Live Band夾,我唱半首,然後另外嗰半首就講故事,而譚俊彥仲會幫手彈埋結他。」

問林師傑有冇「愛的宣言」?佢最初話唔知,但之後又改口:「其實都有安排喺起菜後講,會簡而精,而Tammy亦話自己都準備咗,已經好清楚要簡而精咁表達。」問到會唔會好快生B?Tammy就話:「未呀,唔想咁快做人阿媽,聽過好多女仔朋友講,都想享受多陣,但又知道有仔要趁嫩生,俾多兩年(時間)啦。」而林師傑又話:「係啦,儲多啲錢先,依家租金好貴,我哋兩個人都好鍾意小朋友,都擔心將來讀書嘅問題,因為屋企人用咗好多時間去栽培我,第日我哋都要花時間去栽培小朋友。」講到呢度,林師傑都開始眼泛淚光,不過Tammy見到佢咁,都仍然係話:「哎呀!好搞笑呀你!」

(資料來源:網上截圖/連結)