薛家燕、李麗珍、江美儀、蓋鳴暉等噚晚到北角出席新戲《豬年運程》首映,珍妹鮮有露面,依然保養得宜,李居明仲話呢套係珍妹復出之作,珍妹話:「唔算,間中都有客串,今次去日本拍攝好似去旅遊。」並獲李居明贈言明年會更好。

珍妹近年主力接活動工作多,簡簡單單,冇咁大壓力,好多時間留喺加拿大生活陪著女兒許倚榕,兩年後囡囡大學畢業,屆時可以甩難。珍妹開始計劃兩年後去向,正處於十字路口,考慮再次拍戲抑或係發展自己興趣畫畫。

女兒已經21歲開始拍拖,珍妹都見過囡囡男朋友,佢話:「唔可以太讚佢,佢哋暫時都OK,個男仔唔係加拿大同學仔,係香港男仔,所以見嘅機會比較少。」至於珍妹嘅情路,珍妹話:「冇呀,唔覺有人追,隨緣啦,冇專登諗。」舊愛潘源良結婚了,珍妹話:「好呀,希望佢開心,我哋冇聯絡,如果有我都唔會唔知佢結婚啦。」

(資料來源:網上截圖/連結)