吳尊出名靚仔,但最近出現一位吳尊版「逆齡大叔」,外型跟吳尊比都唔輸蝕,佢係邊個?…佢咪係…汶萊地產大亨吳景添,即係吳尊爹哋。

吳尊繼之前出動對仔女參與《爸爸去哪兒5》,連老婆都戴住口罩登場。最近吳尊再參與大陸一個真人騷節目《最美的時光》,節目噚晚播出,今次呢個節目,吳尊就搵埋佢位逆齡爹哋登場。節目中除咗吳尊,仲有向佐同媽咪向太陳嵐,以及台灣藝人郭碧婷、中國劍擊隊運動員孫偉、同王祖藍旗下嘅大陸歌手劉維。

吳爸爸登場時,其他人睇到吳爸爸嘅介紹同片段,已經嘩嘩聲,讚吳爸有型又帥氣,向佐不禁話︰「強大基因。」吳尊仲踢爆爹哋年齡,原來吳爸爸今年已經72歲,睇落似50幾,一啲都唔似年過70嘅老人家。

吳尊喺節目中透露,話爹哋畀子女好大自由探索呢個世界,而且脾氣好好,從來冇見過爹哋大聲同人嗌交,甚至唔會鬧仔女。吳尊仲話爹哋唔打仔女,節目中吳尊反問爹哋︰「應該沒有打過我一次吧。」吳爸就話︰「沒有,從來沒有,我從來不會打孩子。」有個有米又帥氣,又唔打仔女嘅爹哋,吳尊真係幸福。

(資料來源:網上截圖/連結)