自從捲入逃稅風波後,范冰冰一直都保持低調,就連自己生日嗰陣,微博幫佢出post慶祝都即刻俾佢删走,「神隠」4個月後,國家稅務總局、江蘇省稅務局公佈追繳及罰款共約10億港元後,冰冰先再「蒲頭」,post出致歉信,其後雖然被發現喺北京出現,不過微博呢?就繼續潛水。

潛咗個幾月,直至剛過去嘅金馬獎又鬥出台獨言論,冰冰先喺微博出招,轉發共青團嘅post,撐中國「一點都不能少」。

嗱,冰冰對住大是大非嘅時候,就高調出post撐中國,不過佢處理私人事就顯得好低調,就好似講過無論有幾難、都會同冰冰一齊度過嘅未婚夫李晨咁,雖然今日係佢嘅40歲生日,不過范冰冰喺微博就冇表示,反而喺下晝,佢就透過微信嘅朋友圈發咗兩張相,一張相信係佢倆嘅愛貓,而另一張,則係李晨小朋友嘅相,然後寫住「人間值得,生日快樂!」,仲加咗3個蛋糕喺後面,而李晨亦有回覆「人間值得」。

其實喺范冰冰今年37歲生日當日,李晨亦有喺微信朋友圈留言祝冰冰「生日快樂」,而且仲好有心思咁喺朝早5時20分出post,向冰冰表達「我愛你」。

(資料來源:網上截圖/連結)