劉丹、滕麗名、歐瑞偉及李偉健等,今天出席活動,佢哋仲為《愛·回家之開心速遞》入圍最佳劇集拉票。

憑《愛》劇被提名最受歡迎電視女角色及最佳女配角嘅滕麗名表示好開心:「仲有大小姐(林淑敏),大小姐都有最佳女配角(提名)。」而滕麗名又指《愛》劇得到劇集提名,係一班人嘅努力,因為如果冇默契、冇努力的話,就唔會有今日嘅成績,而佢仲話想同大小姐可以擦出更加多嘅火花。問到滕麗名對攞獎有冇信心?佢就話:「唔係冇信心,不過對手好強,所以會以放鬆心態去面對。」

另外,提到佢有份主持嘅節目《街市遊樂團》星馬篇,都有被提名「最佳非戲劇節目」,滕麗名就笑言自己係百搭,仲話自己又要拍劇同排舞台劇,搞到連老公都冇時間見,好彩老公冇投訴。

(資料來源:網上截圖/連結)