聽日係賭王何鴻燊嘅97歲生日,近年佢嘅生日已經好少搞慶祝活動,大多數留喺屋企同各房子女輪流慶祝,不過今年賭王嘅生日,因為身體問題而入院休養。

今日下晝五點半左右,三房嘅大女何超雲、何超蓮同細佬何猷啟先後到達養和醫院,問到準備點樣同爸爸慶祝,猷啟話:「生日蛋糕都預備咗,係家姐訂做,所以唔知佢哋訂咗乜嘢款。禮物方面都係一啲平常用到同埋保溫嘅嘢,希望佢身體健康。」問到未婚妻點解冇現身,猷啟就話因為佢唔喺香港。至於賭王點解入醫院,猷啟就話:「其實都冇乜事,有心。」唔知賭王又有冇了解吓婚事?佢話:「我都有同爹哋講,係明年,不過暫時唔可以透露。」

隔咗一陣,着住運動衫嘅超蓮好匆忙咁趕上咗去,睇嚟係趕住同爸爸切蛋糕。過咗大約半個鐘左右,佢哋三姊弟離開醫院,超雲影完合照之後,同猷啟先行離開,留低超蓮接受訪問,超蓮話:「我哋切咗蛋糕喇,大家都好開心,我哋特登訂做咗個紅菜頭蛋糕,呢個蛋糕已經冇再出,為咗專登為爹哋而做,就算我哋自己整,都一定要有呢個蛋糕。」問到賭王嘅身體情況,佢話:「OK呀,幾好,佢係入院檢查,邊度慶祝都冇所謂,最緊要係身體好。」

禮物方面,超蓮話:「我哋係一齊準備呢份禮物,有帽同襪,總之係保暖嘅嘢。」之後再問點解唔留耐啲?超蓮就話:「趕住去做義工,我o依家去沙灘執垃圾,希望可以盡快執晒啲垃圾走,晏啲再返嚟陪爹哋。」唔知到時會唔會一齊食晚飯?佢就話:「佢唔係好食得到出面啲嘢,怕有菌,食咗蛋糕就OK。」至於媽咪又有冇親自下廚,超蓮話:「媽咪主要搵啲保暖嘅衫俾爹哋。」

大約在6點10分左右,三太離開醫院,心情勁靚嘅三太接受訪問:「佢(賭王)好開心,精神好好,佢真係好鍾意食嗰個蛋糕。」之後會唔會再補食生日飯,三太就話:「聽日先係何生生日正日,舊曆係十月二十六日,今日係輪到我哋提早一日做生日,到時睇吓何生身體狀況,再決定會唔會補食飯。」

此外,過往二房都會將賀禮捐去公益金做善事,今年亦不例外,公益金方面今日公佈二太藍瓊纓,加上5名子女超瓊、超鳳、超蕸、超儀與猷龍名義合共捐出200萬港元做善事,賀賭王97歲生日,公益金就代表受惠人士向何博士及其家人致以由衷謝意。

(資料來源:網上截圖/連結)