黃嘉樂、鄭嘉穎、馬國明、唐詩詠及林子善當年拍電視劇《鐵馬尋橋》,friend足咁多年,組成「鐵馬家族」,每逢生日嘅月份,或者大時大節,佢哋都喺網上貼出溫馨嘅合照,佢哋更愛屋及烏,不時攜眷出席飯敍,相處猶如一家人。

今日黃嘉樂喺Ig貼出大合照,留言:「謝謝親愛的,靜悄悄約晒呢班大忙人,送給我一個驚喜生日會,多謝大家,在心中!」不過相中唔見鄭嘉穎同陳凱琳,未知嘉穎係唔係出埠登台,所以抽唔到時間出席,而陳凱琳又陀緊BB,要多啲休息先冇現身。

今次呢個生日會原來係黃嘉樂女友Samantha為咗俾佢一個驚喜,事先book咗餐廳房,唐詩詠、黃心穎、馬國明、樂瞳、楊潮凱、傅嘉莉及陳少邦等,一早喺房等黃嘉樂,個個拎住手機影住門口位,等影黃嘉樂一入房嘅驚訝樣,Samantha又指林子善都有幫手安排呢個生日會,大讚林子善叻,林子善有喺Ig貼相,希望黃嘉樂日日開心,事業順利,快啲結婚,而唐詩詠就搞笑咁貼出合照,相中見黃嘉樂、林子善同唐詩詠一齊扮馬國明露出天然呆樣,唐詩詠更打tag稱「你生日你大晒」、「你叫我哋影咩就影咩啦」,估計係黃嘉樂叫佢哋扮。

(資料來源:網上截圖/連結)