劉德華因為確診流感,噚晚宣佈再取消多4場演唱會,前後共有7場騷取消咗。大會亦已經發聲明,呼籲持有呢幾場騷有效門票嘅觀眾,要保留門票,等待主辦機構宣佈後續安排事宜。

喺28日華仔首日腰斬演唱會之後,已經有網民呻苦,話以$6,000買咗$980飛,又搵唔到個黃牛賣家。消委會總幹事黃鳳嫺早前亦表示,大會退票時對消費者的保障只限於門票的原價,故黃牛飛對消費者的保障「非常之低」。

正當呢啲黃牛買家擔心緊嘅時候,有自稱係黃牛賣家喺facebook群組到出post,話自己退番全數金額畀佢嘅買家。呢位黃牛賣家甚至舉例,有行家以$12,500賣咗兩張$980飛,佢話知道買家係辛辛苦苦搵錢,勸行家「拎番個良心出嚟」、「唔夠你致富發達」、「將心比己」、「為咗錢冇咗做人嘅道德底線」,佢又公開行家個人資料,叫佢哋考慮下消費者嘅感受。

雖然呢位黃牛賣家「充滿良心」,不過留言嘅人就唔係咁睇,先係指出買賣黃牛本身已經唔啱,退飛只係五十步笑百步,又有人話呢位黃牛賣家識推廣,做個良好形象出嚟引人下次再幫襯,甚至收咗啲飛返嚟,就可以等大會安排退錢,完全唔會蝕。


(資料來源:網上截圖/連結)