謝安琪(Kay)同麥浚龍(Juno)嘅《The Album(PART ONE)》奪得叱咤《至尊唱片大獎》,Kay亦連掃3.5個獎成為大贏家。二人噚晚出席慶叱咤功宴,Kay話:「今年抱住輕鬆心態嚟,去年1月1,我同家人出街食飯,揸車聽收音機,聽到歌手講感言好感動,亦都好關心,因為我都係樂壇一份子,雖然冇參與。」事隔一年,今年到自己出席呢個頒獎禮,Kay話事前已同自己講要保持呢種輕鬆心態。

Kay又話自己好開心見到古仔到場,至於老公張繼聰點解唔到場支持,佢話:「佢本身想嚟,但遲啲要開戲,同古仔去外地拍戲,所以我想佢留喺屋企多啲陪小朋友。」

Juno就坦言事前一直有同古天樂溝通,邀請佢出席叱咤頒獎禮:「結果有嚟,拎到大碟獎唔係一個人功勞,而係成個團隊嘅功勞,古仔都係呢個團隊嘅一份子,知佢呢排忙緊拍戲。」問到Juno點解上到台都唔肯唱歌?佢話:「冇準備過,唔打算唱,專輯有好多首歌,唔知現場會播邊首。最近好少出席頒獎禮,我嚟到係歷史性,古仔都係歷史性。」

講到有報道話Juno有興趣邀請張繼聰簽約旗下公司,Juno話:「對任何人都有興趣合作,o依家做緊電影配樂,新一年又要做唱片part2,暫未有計劃住。」

(資料來源:網上截圖/連結)