呢幾日天氣寒冷,不過返工返學嗰啲冇數計,一切如常。至於一班熱血嘅足球小子,亦如常練波,陳豪同陳茵媺(Aimee)嘅囝囝都係其中一員,今日Aimee喺Instagram貼相,話自己今朝湊仔去踢波,但就凍到儍咗,仲話自己連打個Ig留言,都要打幾次先成功,因為自己啲手指凍到僵硬晒。

有唔少網民都留言叫Aimee要小心身體,好好保暖,仲有人好貼心咁叫佢買對可以戴咗都繼續撳到手機嘅手套,Aimee有問番網民喺邊度有得賣,各路網民都踴躍提供意見。另有網民留言問Aimee,話佢明明生於加拿大,而且喺嗰邊長大,好應該一早適應到凍嘅氣候,點解嚟到香港竟然會嗌凍,點知Aimee自己都笑言,都有呢個諗法,仲話唔知自己點解會咁。

另外,Aimee今日張相係少少握拳托頭,有人就留意到佢手上嗰隻鑽戒粒石又大又閃,成個focus唔同晒。

(資料來源:網上截圖/連結)