歌神張學友噚晚在高雄巨蛋舉行台灣站尾場巡唱,佢在台上話唱咗歌34年,自己仲上網查過,據統計資料指佢已經開咗800場演唱會:「不瞞大家說,本人今年57歲,網上流傳張學友的演唱會以後沒得看了,看一場少一場 ,我來闢謠一下,本人會繼續唱的,如果可以唱、可以跳的話,不管我是60、70歲!」

噚晚學友雖然抱恙演唱,不過佢話唔會降key,仲保證大家睇到嘅演出,唔會比前兩場少,唯一係冇咗一字馬表演,因為佢換咗新戰衣,條褲太緊冇辦法做一字馬,笑言話擔心會「爆軚」,希望60歲再開騷時仲可以擘腿畀大家睇。

學友仲感激主辦單位好細心,噚日安排傍晚6點開騷,方便唔係住喺高雄嘅觀眾,可以趕搭高鐵返家,學友笑言好少咁早開場,好似happy hour感覺,非常特別。學友除咗唱出連串經典歌之外,現場外國樂手用喇叭吹咗首歌,就係台灣天后江蕙(暱稱二姐)嘅台語歌《家後》,學友搞笑叫停:「先停一下,這是張學友的演唱會,這個是二姐非常流行的歌曲!」學友話自己只唱過一次,之後就清唱《家後》,現場觀眾都好驚訝學友識唱台語歌,掌聲雷動。

完成台灣站演出後,呢個禮拜五(11日)學友將返主場香港開騷,喺紅館舉行15場演唱會,學友話完成巡唱後,自己會休息一段時間,好好諗吓新方向再出發。

(資料來源:網上截圖/連結)