李麗珍(珍妹)53歲生日,話晒珍妹喺娛樂圈打滾幾十年,當然識咗唔少好朋友,於是一班朋友相約珍妹一齊慶祝,好姊妹張文慈(Pinky)噚晚喺社交網post咗啲party相,原來佢同埋關禮傑、吳嘉麗、巨聲幫嘅陳國峰、仲有坤哥吳業坤等等,齊齊為珍妹慶祝生日。

Pinky仲post咗同珍妹頭貼頭嘅合照,不過成件事嘅亮點,當然係珍妹凍齡有術啦。珍妹83年入行拍電影,嗰陣已經有唔少人讚佢個樣好pure,點知轉個頭走去拍三級片,由玉女變咗做性感女神,之後又返咗去無綫拍劇、做歌手、拍電影,喺99年仲憑許鞍華執導嘅電影《千言萬語》,成為金馬獎同金紫荊獎嘅最佳女主角。

近年珍妹嘅生活比較清閒,大部份時間喺加拿大陪阿女許倚榕,不過囡囡好快就大學畢業,珍妹話考慮緊究竟拍番戲,抑或係發展自己興趣畫畫,最近珍妹仲搵咗陳國峰做健身教練,話目標係練出人魚線,唔知佢係咪有新搞作呢?

(資料來源:網上截圖/連結)