朋友之間輸賭,間中都會吹到波咁大話「輸咗我裸跑」,但現實又有幾多人會找數?不過呢,大圍呢位大媽,就真係唔知玩咩玩到咁大,竟然當街裸跑,嚇到途人O晒嘴,噴晒飯!

讀者劉先生今日下晝近1點,喺大圍見到咁驚心動魄嘅呢一幕,當時佢由積泰里一幢大廈,見到一位光脫脫嘅大媽,同警員對峙,其間不停向住附近一間中學大叫,片段見到,一男一女警員雙手捉住大媽,但大媽依然周身郁,最終警員一下反手將佢按落地,另一位就好貼心咁幫佢冚上毛氈遮住,之後又尷尬地行開。過咗冇耐,有一男一女便裝警員趕到,最後大媽由救護車送院。劉先生話當時咁啱係中學午飯時間,一班學生見到即刻尖叫,更加有人歡呼。

事件極速喺網上瘋傳,其中一張相影到身材肥胖嘅大媽跑經現場,不過相中嘅亮點,並唔係大媽,而係旁邊兩位職安真漢子O晒嘴嘅表情,佢哋呢個年紀,咩風浪未見過吖,但而家俾大媽嚇到呆咗,真係「紅都面晒」呀!

警方表示,裸女身上冇任何證明文件,初步相信事件唔涉及刑事成分,改列「發現懷疑精神紊亂人士」。