連凱、吳彥祖、尹子維同陳子聰當年組成Alive組合,一向老友鬼鬼,尹子維早前認愛內地女星徐冬冬,旋即被挖情史,點知噚日大陸報道搵到一張連凱老婆搭住尹子維嘅相,傳出尹子維疑「熱吻連凱的妻子」,又指連凱當場黑面,兄弟反目,更將連凱老婆Amanda,誤認為中法混血兒Amanda S.,搞到噚晚11點幾,連凱要喺微博為好友尹子維澄清。

連凱稱噚日收到一篇新聞,令佢忍唔住笑出聲,佢解釋尹子維同太太Amanda嗰張合照,係喺Alive一次慶功宴上影嘅,大家只係傾偈,而連凱當時都喺旁邊,太太同尹子維本身都係好友,關係猶如一家人,「從我27歲時候我們就在一起了,她叫Amanda,怎麼會把另一位演員Amanda S.扯進來了,真是對不起人家,無緣無故讓人多了個情史。」報道更搵番Amanda S.與尹子維喺電影《絕色神偷》嘅劇照,講到似層層咁!

連凱又指認識尹子維多年,對方並唔係花心嘅人,不明白點解要咁樣寫佢,最後祝福好兄弟尹子維同徐冬冬一定要幸福,尹子維亦有回應」Thanks homie!!!」感謝好友,尹子維亦冇畀呢啲傳聞影響心情,凌晨貼出女友徐冬冬攬住俄羅斯娃娃嘅相,大晒幸福。

(資料來源:網上截圖/連結)