諸葛紫岐(Marie)、翁嘉穗、曾昭亮同林心兒等,今日喺中環出席品牌活動,Marie努力工作同湊仔,記者笑問佢有冇努力造人?Marie笑言:「都要,希望快啲有好消息,想生豬仔,我好鍾意豬,大家都夾,希望可以快啲。」Marie就呻老公冇時間:「都要佢得閒先得,其實老公真係好忙,好多嘢做,同埋要陪住我哋個仔,分配時間上,工作多啲、阿仔多啲、老婆少啲,算喇!投訴到冇用,我放棄啦,自己做自己嘢,同埋湊仔,ok嘅!o依家時代唔同,好多女性都要出去做嘢,有事業係好啲。」

問到囝囝有冇話想要細佬妹?Marie話:「佢日日都講好多次,不停咁講要細佬,佢仲話啲玩具可以留番畀細佬,如果生女嘅,就要嘥錢再買,o依家佢啲衫同鞋,我都keep住先。」問到係咪怕囝囝錫晒妹妹?Marie話:「我覺得佢係好鍾意照顧小朋友嘅,佢仲應承咗我幫BB沖涼、同BB瞓覺,聽到之後都好開心、好sweet。佢真係好期待,成日叫媽媽努力啲,用力啲就得㗎喇,真係好好笑。」而農曆新年Marie一家去滑雪度歲。

另外,翁嘉穗大仔喺去年於「香港健力錦標賽」蹲舉、卧推舉同硬舉打破香港舊紀錄,問到囝囝畢業後會唔會成為職業運動員?佢就話:「應該唔會喇,佢讀緊business,係好開心嘅,做呢一項運動係因為唔使太多時間訓練,佢遲啲應該會幫Daddy手,佢細細個就會跟住爹哋去巡舖,佢都好有興趣。」翁嘉穗稱囝囝可以接爸爸棒係好開心嘅事。

(資料來源:網上截圖/連結)