當伍詠薇遇上王君馨,兩女竟係大打出手,伍姑娘今日凌晨喺facebook貼出同王君馨噚日咁啱喺美甲店撞到相片,佢哋傾咗幾句,就大打出手。伍姑娘紮馬,王君馨踢腿,最勁揪張相係王君馨將左腳放上伍姑娘肩膊。穿上黑色小背心嘅王君馨,除咗吸睛,動作亦俐落,好有打女風範。

伍姑娘貼完相,仲留言:「昨日你我相遇。我倆在不同平台將拍攝新劇。雖知友誼第一,比賽第二。但好勝嘅我們亦忍不住切磋武藝,你…君馨姑娘嘅……『十二路譚腿』,我…伍宗師嘅『盤骨大裂開』,最後都打到不分高下,雖則大家都不同門派。但都有一個共通點,你的腿的確踢得好高,而我的盤骨同雙腿都擘得好行,大家都不約而同下盤功底十分厲害。能夠遇到咁強對手,實在難得,期待下次相遇,繼續切磋,我吹水吹到自己都信咗。」

(資料來源:網上截圖/連結)