陳煒、吳卓羲、郭晉安、楊怡、鍾鎮濤、陶大宇等今晚去到九展出席一個日本健康食品品牌嘅5周年晚會。另外四位視帝王浩信、陳展鵬、馬德鐘、陳豪亦有出席,四位視帝同場合照。

煒哥受訪時話最近忙緊拍《法證先鋒4》,嚟緊新年初一二三都有假放,希望套劇拍到三月可以有時間休息。佢話雖然係忙,但都多謝梅小青安排咗好多時間俾佢,可以出騷搵下錢。煒哥話搵得唔少,都算係一個OK嘅肥年,咁有冇打算獎勵自己?佢就話之前睇過啲樓盤,希望把握機會今年入市。

李嘉誠噚晚出席長實周年晚宴,講到預期今年樓市波動,煒哥都話:「o依家價錢OK,希望年中再平啲,自己都等下。學李嘉誠講,自住啱價就買。」不過佢話唔會買太大嘅屋,怕間屋太大會顯得自己孤獨。咁買樓條件呢,佢就話同揀男朋友一樣:「最緊要實用,唔好太花巧同太多包裝。」

郭晉安同楊怡一齊受訪,郭晉安話嚟緊新年要上大陸開劇,未試過喺大陸過年,楊怡建議佢可以放吓煙花。問到楊怡o依家係咪減少拍劇,佢話:「大家見我咁fit,(生BB)都唔急,小朋友緣份到就有架喇。」記者笑言會否綁住老公喺張床度,暗示可以加快造人速度,郭晉安插嘴話可以返去試,但楊怡就話:「唔會架,佢(老公羅仲謙)一谷就斷架喇條繩。」

問到安仔有冇過兩招俾楊怡:「呢啲都真係緣份嚟嘅,我嗰陣時諗住可以開心耐啲,點知就咁快,其實每一個moment都係享受,未有BB之前可以二人世界。」楊怡話o依家同媽咪一齊住,形容媽好似細路仔咁要人哋照顧,又會煮埋飯咁,而佢媽咪約佢一齊買餸,但楊怡話太早,朝早七、去點去買靚嘢,佢會起唔到身。

(資料來源:網上截圖/連結)