曾經參選2015年港姐,有「翻版楊洛婷」之稱嘅Mandy Ng(吳佩倫),當年憑住火辣身材成為大熱,但最後因為競選壓力太大而退選,話要返美國完成學業。

Mandy雖然未有正式入過娛樂圈,但佢喺社交網嘅人氣都唔弱,因為佢從來唔吝嗇美好身材,經常都晒三點式泳裝照,又着低胸裝飲奶,真係睇到噴血!去年9月,Mandy宣佈一個好消息﹕「我俾人落咗訂啦!」原來係Mandy同男朋友浸緊風呂期間,男友突然攞出戒指向佢求婚,相中見Mandy穿上比堅尼,笑到掩晒嘴,仲騷埋大大粒鑽石戒指,幸福到唔知點形容。

日前Mandy再喺Ig透露已成為人妻喇,而婚禮比起求婚過程更加特別,冇華衣禮服,只係着住一件普通運動衫就去行禮。Mandy上載一張咀嘴合照,用英文留言﹕「我哋今日做完Gym失驚無神走去結婚。我哋冇計劃、冇化妝、冇華麗服裝、冇戒指。」佢話同老公之前係計劃返香港、台北同夏威夷三地舉行婚禮,最後決定只喺夏威夷同台北舉行,估唔到最最最後只係好casual咁着住運動服行禮,佢話諗都冇諗過。

(資料來源:網上截圖/連結)