陸浩明(6號)同女友陳詩欣(Ayan)拍住拖出席喺銅鑼灣舉行嘅情人節活動,Ayan大讚男友不只口才好,內在都好細心,平日收到嘅禮物着重男友份心思多過價值。6號亦無令女友失望,送上一盆親自插花嘅小盤栽畀女友。日前喺節目中自爆叫錯女友為Mayanne(麥美恩),6號解釋只是口快快叫錯,而女友同Mayanne係唔同嘅靚,Mayanne擁有嘅係內在美,要識耐咗先發掘到。

Ayan指可能6號當晚同Mayanne拍擋主持節目先叫錯,6號笑住話:「我試過叫佢做Do姐同肥媽,不過我同肥媽冇緋聞,大家觀眾唔好再傳喇。」問到今年是否兩人結婚好日子?6號將責任推給特首林鄭月娥,佢話:「希望置業先,先安居再談婚事,女友對住有啲要求,希望年中睇啱單位。」佢又笑指置業後又要買隻好好睇睇求婚戒指,講到呢件事,6號即滿頭大汗要女友幫手印汗,問到Ayan係唔係非君不嫁?佢笑住話:「未必㗎,仲有好多選擇。」佢話最緊要係男人專一,仲講笑話千其唔好叫錯女友名。

(資料來源:網上截圖/連結)