首屆「KKBOX香港風雲榜」頒獎典禮將於三月舉行,大會今 喺灣仔率先舉行發佈會,並公布「十大風雲歌手」同「年度新人」嘅得獎名單。有份被選為「風雲歌手」嘅張敬軒、李幸倪(Gin Lee)同陳柏宇,同埋「年度新人」得主曾樂彤亦有到場支持,其餘「風雲歌手」有陳奕迅、楊千嬅、容祖兒同胡鴻鈞等。

今年頒獎禮大贏家張敬軒又攞獎,佢笑謂:「16.5個啦,日日都有進帳,如果銀行啲存款都係咁就好啦,出嚟做嘢,皮費好大架。」講到呢個頒獎禮,佢就話好期待,因為有接近演唱會嘅製作同資源:「可能佢哋冇香港頒獎禮咁多制肘,就好似韓國嘅MAMA頒獎禮咁,係一個頒獎禮之餘,仲係一個好好睇嘅大騷。」

講到早前演藝人協會亦有意舉辦頒獎禮,張敬軒話:「呢個都會係借鏡,不過大家都明,本港任何機構去搞,都要喺商業同機制上考慮,唔係呢一、兩年可以成事。」張敬軒仲話雖然自己身為演藝人協會副會長,但係因為太忙冇乜實際貢獻,所以都好內疚。

同場嘅Gin Lee日前被爆搭上富二代男友,升呢住豪宅。問到係咪要恭喜佢有新戀情?佢話:「講真上到C1,我都嚇一嚇,醒晒,希望下次上C1係因為音樂上嘅成就。」追問到係咪拍拖,Gin Lee就反問記者:「邊有時間拍拖吖?我之前講過要低調做人,高調做音樂,所以生活上都係低調啲啦。」

咁係咪想保護戀情?Gin Lee繼續遊花園:「呢幾年自己都好畀心機,我知道你哋睇住我大,好多謝你哋咁關心我、想我幸福。不過兒女私情放埋一邊先,我哋都係討論番啲國家大事,嚟緊我會進軍大中華,推出全新國語碟。」

(資料來源:網上截圖/連結)