Dear Jane 出道十四年,今年三月十六、十七首次紅館開騷,今日喺尖沙咀舉行宣傳,公佈演唱會兩場優先預購已售罄,成績唔錯,唱片公司高層現身送上香檳、紅酒、威士忌等畀Dear Jane。大會安排四子喺揀出過往相片環節,主音Tim自爆一張同太太楊洛婷合照來源,佢話:「張相係第二次喺Star Hall開騒,太太錫咗我一啖,第二年就生咗個BB。」 有喜亦有悲,佢哋重提過往試過開騷情況慘淡,得三位觀眾。

等咗十幾年終於踏上紅館,Dear Jane話唔算等到頸都長,一直大家夾band唱歌都係諗住出碟,冇諗過咩場館開騷問題,開到演唱會當然好開心。回憶起2011年喺馬場做騷,得三位觀眾,佢哋話:「覺得好難受,同年年尾公司幫我哋搞騷,第一個星期只係賣咗七張飛,嗰陣時距離依家嘅路真係好遠,呢件事真係記一世,當其時又畀公司同事埋怨。」今次紅館騷佢哋話會玩火,但點玩法就未知,但絕對係真火同一定安全, 形成一個火舞間效果。

表演嘉賓方面Dear Jane話未完全確實,但就有男有女,都係合作過嘅人,至於主音Tim太太楊洛婷同女兒會否上台,Tim話冇聽過太太唱歌,不妨重演相中寓意,錫一啖生多個,連續兩晚就打孖上,Tim笑笑口話:「又得。」

(資料來源:網上截圖/連結)