岑麗香同陳家樂今日喺鑽石山出席活動,香香喺活動中指懷孕係最大嘅幸福,家樂被司儀問到有冇憧憬做爸爸?佢面紅紅咁話:「都想,過多幾年先!」香香笑佢:「唔係今日喎!」及後大會安排佢哋即場為公仔換尿片,香香好快搞掂,相反家樂就有啲雞手鴨腳。

繼上星期香香着4吋高踭鞋出席活動後,佢今日「進步」咗,着咗一對5吋高嘅高踭鞋襯露肩裙現身,佢話:「着過好多次高踭,粗踭安全啲。」香香透露老公強強返咗加拿大做嘢,之後會返香港過年。佢表示要準備封利是:「上年我好大收穫(懷孕),一個好大嘅祝福,所以今年要勤力啲封利是,送番祝福畀大家。」近日天氣忽冷忽熱,香香表示有啲作病,但幸好有醫生一直照料,佢話:「冇事嘅,BB成日好強咁踢,強過我好多,真係一個強強BB。」見香香換尿片手勢純熟,佢話:「呢段時間做咗好多資料搜集,亦都準備上(育嬰)堂,強強都會上,因為係佢book,好叻仔呀!」

家樂表示農曆年有唔少傳統習俗要跟從:「大年初一要着紅色底褲,因為我阿爸好迷信,唔知係咪年齡漸長,好沉迷人哋講嘅嘢,平時我屋企唔擺桃花,上年開始擺,我又有啲好成績,佢就認為係桃花,所以今年又要再買,紅色底褲、初一唔洗頭,都係阿爸叫我做,佢仲買埋紅底畀我,好彩初一着,日日着就唔掂,好容易現條邊出嚟。」佢又指屋企最近裝修,所以同家人要搬去其他地方暫住:「我大後日要去拍《緊急救援》,年三十晚先返香港,我阿爸好想過年前搬返屋企住,所以我要搵好多朋友幫我手。」

(資料來源:網上截圖/連結)