李彩華(Rain)趁着日前情人節,在社交網宣佈已婚升呢「Mrs. Huang」,自揭已嫁予拍拖半年的內地商人Eric。Rain接受傳媒訪問,自爆老公在她去年生日求婚,逗得她有如「食錯藥」一般開心狂笑。Rain與老公都喜歡小朋友,Eric更講到明生小朋友越多越好,不過她不急於趕做「豬媽」,希望順其自然。

現年35歲的李彩華(Rain)趁情人節宣佈已榮升黃太,她在社交網留言:「Rain+Eric=Mr & Mrs Huang!」自揭已嫁予拍拖半年、從事鋼鐵生意的內地商人Eric。她又貼出印有二人卡通造型的利是封,以及在希臘聖托里尼小島的照片,估計她和Eric早前到希臘度蜜月。

Rain日前接受傳媒訪問,表示已於2月2日領證結婚,稍後會補辦婚宴。她又自爆Eric於去年她11月11日生日當天求婚:「嗰日我要開工,等我收工之後就同我求婚,又預先佈置好晒一個地方。」不過Rain未有感動落淚,她笑說:「佢同我講:『親愛的,可唔可以嫁給我?』我就係咁笑,好似食錯藥咁,我都唔知自己會有咁嘅反應,以前會諗自己可能會喊。」

拍拖半年就閃婚,Rain大方地說:「其實呢啲好睇雙方,我每次拍拖都好認真,兩個人都有一個想法,就好自然發生。」Rain指老公比她年長幾歲,兩人已經相識多年,Rain甜絲絲地說:「之前我有拍拖,佢話其實一直暗戀我,後來知道我變單身,佢就想辦法同我聯絡。」

Rain表示會在香港及內地補辦婚宴,但未落實時間地點,可能會在年底。至於選擇在2月2日結婚,Rain表示沒有特別意思:「我11月11日生日,本來想1月1日,但呢日唔得,所以就2月2日,個日子都好記啲。」今年趕得及首次以人妻身份在農曆新年派利是,Rain笑說:「係呀,所以之前都印定啲利是封。」Rain曾經透露希望婚後生小朋友,問她會否做「豬媽」,她反應甚大:「會唔會太趕呀!順其自然啦,但都會喺呢一兩年發生,老公都好鍾意小朋友,佢話越多越好!」


(資料來源:網上截圖/連結)