歐聯賽事又再展開,其中巴黎聖日耳門面對布魯日,憑住麥巴比大演帽子戲法,再加上伊卡迪梅開二度,最終PSG以5:0大炒對手。雖然收下一場大勝,但有一位PSG嘅球員可能就唔太高興啦,佢就係巴西射手尼馬,因為佢再一次因傷無辦法上陣比賽。

作為世界最高轉會費紀錄保持者,尼馬喺2017年以2.22億歐元由巴塞隆拿轉投聖日耳門,但最新嘅統計卻指出,尼馬加盟PSG後因傷休戰嘅情況極為嚴重,於PSG嘅出勤率僅得50%(126場上陣63場)。

尼馬於PSG缺陣嘅63場比賽入面,有8場為停賽關係,亦即係話當中有55場係因傷或健康問題缺陣的,而有媒體就統計了尼馬因咩傷停過休息左幾多日。其中2018年1月,尼馬因大腿受傷缺陣6日,然後1個月後腿部受傷又缺陣90日,再之後較為嚴重嘅受傷則於2019年1月腿部再受傷休息85日,同年6月再因胹裸受傷休戰90日。

如今尼馬再次因為膕繩肌受傷而休戰,今次唔知又要抖幾耐。呢位曾經被評為繼美斯及C朗拿度後嘅世界第三球員,因為傷患纏身,再加上球品問題,與世界最佳越走越遠,甚至連金球獎最後30強亦都入唔到,作為球迷真係只可以講一句可惜,而聖日耳門就更加只可以嘆一句貨不對辦了。